Անգլերենն առանց բարդույթների

Մեր օրերում անգլերենն ամենուր է, իսկ անգլերենի իմացությունը ՝ խիստ ցանկալի և անհրաժեշտ։ Շատերը ձգտում են լավագույնս տիրապետել մեր օրերի ամենապահանջված լեզվին, սակայն հաճախ հանդիպում են որոշ բարդույթների և որոշում կիսատ թողնել սովորելու ընթացքը։ Այնուամենայնիվ, հետևելով մի քանի պարզ և օգտակար խորհուրդների ՝  անգլերեն սովորելու ընթացքը Ձեզ համար կդառնա առավել հաճելի և անխոչընդոտ։

Խորհուրդ 1․Խուսափե´ք հեշտ ճանապարհներից։ Լեզու սովորելը պահանջում է երկար ժամանակ և անսահման նվիրվածություն, այդ իսկ պատճառով մի´ տրվեք «Սովորի´ր անգլերեն ընդամենը երեք ամսում» և նմանատիպ այլ արտահայտությունների, որքան էլ դրանք գրավիչ թվան։ Հատկացրե´ք անգլերենը բարելավելուն օրական առնվազն 20 րոպե, դիտե´ք ձեր սիրելի ֆիլմերը անգլերենով, նույնիսկ եթե ամբողջովին չեք հասկանում։

Խորհուրդ 2. Մի´ վախեցեք սխալներից։ Շատերը կաշկանդվում են անգլերեն խոսելիս, քանի որ վախենում են սխալվել։ Հիշե´ք ՝ յուրաքանչյուր սխալ հնարավորություն է։ Ինչպե՞ս կբացահայտեք և կշտկեք ձեր սխալները, եթե խուսափեք անգլերեն խոսելուց։ Չկա մեկը, ով երբեք չի սխալվում խոսելիս, չէ՞ որ նույնիսկ մայրենի լեզվով խոսելիս մենք հաճախ ենք սխալներ թույլ տալիս։ Փորձեք կենտրոնանալ ոչ թե սխալների, այլ ինքնավստահ և անկաշկանդ հանրային խոսք ձևավորելու վրա, քանի որ այս դեպքում շատերը նույնիսկ չեն էլ նկատի այդ սխալները։

Խորհուրդ 3. Մի´փորձեք մտքում ամեն բան թարգմանել։ Հաճախ կարող եք բախվել լեզվամտածողության տարբերությունների հետ, երբ նույնիսկ համապատասխան թարգմանություն չեք կարողանում գտնել տվյալ բառի կամ արտահայտության համար։ Ավելի հեշտ է լեզուն սովորելու ընթացքում մտածել անգլերենով ՝ պատկերացնելով թե դուք հենց բնիկ լեզվակիր եք։ 

Խորհուրդ 4. Մի´ կենտրոնացեք միայն քերականության վրա։ Քերականությունն անգլերենին տիրապետելու հիմնաքարն է, սակայն չափից շատ կենտրոնանալը միայն քերականության վրա կարող է երկրորդական պլան մղել մյուս ասպեկտները, որոնք նույնպես շատ կարևոր են լեզուն յուրացնելու համար (անգլերենով գրքերի ընթերցանություն, բառապաշար, լսողական առաջադրանքներ և բանավոր խոսք)։ Փորձեք ուսումնասիրել և յուրացնել անգլերենի բոլոր ասպեկտները հավասարապես։

Հոդվածի հեղինակ ՝ Լյուսի Խաչատրյան, անգլերենի ուսուցիչ