Կենտրոնացման խնդիր․ պատճառներ, ախտանշաններ և լուծումներ

  Ժամանակակից կյանքում մարդիկ հաճախ բախվում են ուշադրության և կենտրոնացման խնդրին։ Կենտրոնանալու անկարողությունը նշանակում է չկարողանալ պահել ուշադրությունը որևէ գործի վրա, շեղվել, մտքի պարզություն չունենալ։ Սա կարող է բացասաբար ազդել աշխատանքի արդյունավետության, ուսման որակի և առօրյա որոշումների վրա՝ հանգեցնելով սխալների, որոնցից կարելի էր խուսաբել, եթե մարդը լիարժեք կենտրոնացած լիներ։

Կենտրոնանալու դժվարության հնարավոր պատճառները․

Կենտրոնացման խանգարումները կարող են ունենալ տարբեր պատճառներ՝ սկսած առողջական խնդիրներից մինչև հոգեբանական և կենսակերպային գործոններ։

Բժշկական պատճառներ – գլխուղեղի ցնցումներ, նյարդաբանական հիվանդություններ, ալկոհոլի չարաշահում և այլ առողջական խնդիրներ։

Կյանքի փոփոխություններ – քնի պակասը, տնային միջավայրի փոփոխությունները կամ առօրյայի խախտումները կարող են խանգարել կենտրոնացմանը։

Սով և ֆիզիկական հոգնածություն – երկար ժամանակ առանց սնունդ մնալը կամ աշխատանքի ընթացքում ուժերի սպառվելը նվազեցնում են մտքի կենտրոնացվածությունը։

Սթրես և անհանգստություն – առաջիկա քննությունների, հարցազրույցների կամ բժշկական հետազոտությունների արդյունքների սպասումը հաճախ շեղում է մարդուն։

Լարվածություն և հոգեբանական ճնշում – պարտականությունների կուտակումը կամ ավելացած պատասխանատվությունը խանգարում են ուշադրության պահպանմանը։

Ախտանշանները․

Կենտրոնանալու դժվարությունը տարբեր մարդկանց մոտ կարող է արտահայտվել տարբեր ձևերով։ Ամենատարածված նշաններն են․

-Վերջին դեպքերը հիշելու անկարողություն։

-Երկար ժամանակ նույն գործին կամ դասին կենտրոնանալու դժվարություն։

-Մտքերի «թռիչք» զրույցի կամ դասերի ընթացքում։

-Մտքերի անպարզություն, արտահայտվելու դժվարություն։

-Բարդ առաջադրանքներ կատարելու անկարողություն։

-Անփութության հետևանքով սխալների հաճախակի կրկնություն։

Ինչպես հաղթահարել կենտրոնանալու դժվարությունը․

Բուժումը կամ լուծումը կախված է պատճառներից։ Եթե խնդիրը կապված չէ առողջական լուրջ հիվանդությունների հետ, ապա ապրելակերպի փոքր փոփոխությունները կարող են զգալիորեն բարելավել ուշադրությունը։

Առողջ սնունդ – հավասարակշռված սննդակարգ՝ ամբողջական հացահատիկներով, մրգերով, բանջարեղենով և սպիտակուցներով։

Սննդի ճիշտ ռեժիմ – օրը մի քանի անգամ փոքր չափաբաժիններով սնվել։

Քնի բավարարություն – օրական առնվազն 7–8 ժամ որակյալ քուն։

Սթրեսի նվազեցում – ընթերցանություն, մարզանք կամ հանգստացնող զբաղմունքներ։

Բժշկական օգնություն – եթե կենտրոնանալու դժվարությունը կապված է հիվանդությունների հետ, անհրաժեշտ է մասնագիտական խորհրդատվություն և բուժում։

  Կենտրոնանալու դժվարությունը խնդիր է, որը չպետք է թերագնահատել։ Անտեսումը կարող է հանգեցնել լուրջ հետևանքների՝ ուսման և աշխատանքի արդյունավետության նվազումից մինչև ճանաչողական և առողջական բարդություններ։ Ժամանակին ուշադրություն դարձնելը և համապատասխան միջոցներ ձեռնարկելն օգնում է պահպանել մտքի հստակությունն ու կյանքի որակը։

Հոդվածի հեղինակ՝ Հալա Բայդուն, Արաբերենի ուսուցիչ